Նորություններ
25/09/2017
ՀՀ ԳԱԱ-ում քննարկեցին գերհամակարգչային նորագույն տեխնոլոգիաներն ու պլատֆորմները

    Սեպտեմբերի 25-ին CSIT-2017 միջազգային գիտաժողովի շրջանակներում ՀՀ ԳԱԱ-ում անցկացվեց «Գերհամակարգչային հաշվարկներ և մեծ տվյալներ՝ հետազոտության և նորարարության շարժիչները» ենթագիտաժողովը: 

    Այսօր աշխարհում տարբեր ոլորտներում կուտակվել են մեծ քանակությամբ տվյալներ, որոնք պետք է համակարգվեն և մշակվեն: Դրանց մշակումը ենթադրում է կազմակերպված առցանց պահեստների ստեղծում: Շատ որոշումների ընդունումը պահանջում է բարդ համակարգերի մոդելների, բարձր արտադրողականության համակարգիչների և մեծ տվյալների բարձր արտադրողականության վերլուծության առկայություն: Տեղեկատվական տեխնոլոգիաները կարող են խթանել երկրի ժառանգության թվայնացումը` ապահովելով բոլորի համար առցանց հասանելիություն:

25092017_2_3.jpg
    Այդ տեխնոլոգիաներից են բարձր արտադրողականության հաշվարկները և մեծ տվյալների պահպանման մշակման գործիքները: Գիտաժողովի ընթացքում ներկայացվեցին գերհամակարգչային նորագույն տեխնոլոգիաներն ու պլատֆորմները, Հայաստանի գերհամակարգչային կենտրոնի ստեղծման հաստատված և այժմյա ձեռքբերումները և գիտական մարտահրավերները։ՀՀ ԳԱԱ փոխնախագահ, CSIT-2017 գիտաժողովի նախագահ ակադեմիկոս Յուրի Շուքուրյանը ներկայացրեց բարձր արտադրողականության հաշվարկների (HPC)  ստեղծման ուղղությամբ Հայաստանում` ՀՀ ԳԱԱ Ինֆորմատիկայի և ավտոմատացման պրոբլեմների ինստիտուտում, տարվող աշխատանքները: Ֆրանսիայի «Աթոս Բուլլ» ընկերության Մեծ տվյալների ռազմավարության բաժանմունքի ղեկավար Ժան-Մարկ Դենիսը ներկայացրեց  գերհամակարգչային տեխնոլոգիաների և պլատֆորմների ստեղծման և գործունեության միջազգային փորձը: 

25092017_2_2.jpg
    Ֆրանսիայի գիտական հետազոտությունների ազգային կենտրոնի (CNRS) Գիտական հաշվարկների ուղղությամբ կոմիտեի ղեկավար, Թուլուզի համակարգչային  գիտության ինստիտուտի տնօրեն, CSIT-2017 գիտաժողովի համանախագահ Միշել Դայդեն ներկայացրեց Ֆրանսիական փորձը բարձր արտադրողականության հաշվարկների համակարգերի զարգացման ուղղությամբ: Հայաստանում տեղեկատվական տեխնոլոգիաների զարգացման միտումները ներկայացրեց Ձեռնարկությունների ինկուբատոր հիմնադրամի տնօրեն Բագրատ Ենգիբրյանը: ՀՀ ԳԱԱ Ինֆորմատիկայի և ավտոմատացման պրոբլեմների ինստիտուտի փոխտնօրեն Հրաչյա Ասցատրյանն իր զեկուցմամբ կարևորեց Հայաստանում գերհամակարգչային կենտրոնի ստեղծումը: 

25092017_2_1.jpg
    Գիտաժողովի մասնակիցները խիստ կարևորեցին Հայաստանում նման հզոր տեղեկատվական տեխնոլոգիաներ ստեղծելու անհրաժեշտությունը, և որոշվեց առաջարկություն ներկայացնել ՀՀ կառավարություն գերհամակարգչային կենտրոնի ստեղծման մասին:

ՀՀ ԳԱԱ Տեղեկատվական-վերլուծական ծառայություն
25.09.2017թ.



Կայքը վերջին անգամ թարմացվել է՝  12:19, 16/09/2021

Գլխավոր էջ - Ակադեմիայի մասին - Բաժանմունքներ - Կազմակերպություններ - Անդամներ - Կապ մեզ հետ - COVID-19 - Կառուցվածք - Նախագահության անդամներ
Փաստաթղթեր - Ինովացիոն առաջարկներ - Նորություններ - Գիտական արդյունքներ - Սփյուռքի բաժինը ներկայացնում է - Գիտաժողովներ - Հրապարակումներ մամուլում - Հայտարարություններ - Լուսանկարներ -
«Գիտություն» թերթ - Հիմնադրամներ - Հոբելյաններ - Հրատարակություններ - Վեբ ռեսուրսներ -
Այլ ակադեմիաներ Համալսարաններ - Լինդաու - Կայքի քարտեզ - Որոնում