Նորություններ
21/03/2018
ՀՀ ԳԱԱ ակադեմիկոս Ռադիկ Մարտիրոսյանը դարձավ «ՀՀ ԳԱԱ զեկույցներ» հանդեսի գլխավոր խմբագիր

   Սույն թվականի մարտի 21-ի նիստում ՀՀ ԳԱԱ նախագահությունը հաստատեց ՀՀ ԳԱԱ նախագահ ակադեմիկոս Ռադիկ Մարտիրոսյանին «ՀՀ ԳԱԱ զեկույցներ» հանդեսի գլխավոր խմբագրի պաշտոնում:
   «ՀՀ ԳԱԱ զեկույցներ» հանդեսը սկսել է հրատարակվել 1944 թ-ից: Ավանդաբար ամսագրի գլխավոր խմբագիրը եղել է ակադեմիայի նախագահը` ակադեմիկոս Վիկտոր Համբարձումյանը: 2004թ-ից  ամսագրի գլխավոր խմբագիրը ակադեմիկոս Վանիկ Զաքարյանն էր: Ներկայացնելով Ռադիկ Մարտիրոսյանի թեկնածությունը  «ՀՀ ԳԱԱ զեկույցներ» հանդեսի գլխավոր խմբագրի պաշտոնում` ՀՀ ԳԱԱ ակադեմիկոս-քարտուղար թղթակից անդամ Հրանտ Մաթևոսյանը նշեց, որ, Ռադիկ Մարտիրոսյանին  «ՀՀ ԳԱԱ զեկույցներ» հանդեսի գլխավոր խմբագրի պաշտոնում ընտրելով, կպահպանվի ամսագրի` ակադեմիայի նախագահի կողմից ղեկավարվելու ավանդույթը: Նախագահության անդամները շնորհակալություն հայտնեցին ակադեմիկոս Վանիկ Զաքարյանին հանդեսի գլխավոր խմբագրի պաշտոնում արդյունավետ աշխատանքի համար:
   Ռադիկ Մարտիրոսյանը ՀՀ ԳԱԱ նախագահն է 2006թ-ից: 2016թ-ին նա ընտրվել է Ռուսաստանի գիտությունների ակադեմիայի արտասահմանյան անդամ, 2018թ-ին` Գիտությունների ակադեմիաների միջազգային ասոցիացիայի փոխնախագահ:
  Ռադիկ Մարտիրոսյանն ավելի քան 200 գիտական աշխատանքի, Շվեդիայում և ԱՄՆ-ում հրատարակված 2 մենագրության հեղինակ է:
   Ակադեմիկոս Մարտիրոսյանի գիտակազմակերպական ու մանկավարժական գործունեությունն արժանացել է Խորհրդային Միության, Հայաստանի, Ֆրանսիայի, Իտալիայի կառավարական բարձր պարգևների: Նա պարգևատրվել է  «Սուրբ Մեսրոպ Մաշտոց», «Հոկտեմբերյան հեղափոխություն», «Պատվո նշան», «Հայրենիքին մատուցած ծառայությունների համար» 1-ին աստիճանի շքանշաններով:

   ՀՀ ԳԱԱ Տեղեկատվական-վերլուծական ծառայություն
   21.03.2018թ.



Կայքը վերջին անգամ թարմացվել է՝  16:16, 18/09/2020

Գլխավոր էջ - Ակադեմիայի մասին - Բաժանմունքներ - Կազմակերպություններ - Անդամներ - Կապ մեզ հետ - COVID-19 - Կառուցվածք - Նախագահության անդամներ
Փաստաթղթեր - Ինովացիոն առաջարկներ - Նորություններ - Գիտաժողովներ - Հրապարակումներ մամուլում - Հայտարարություններ - Լուսանկարներ
«Գիտություն» թերթ - Հիմնադրամներ - Հոբելյաններ - Հրատարակություններ - Վեբ ռեսուրսներ - Այլ ակադեմիաներ
Համալսարաններ - Լինդաու - Կայքի քարտեզ - Որոնում