Սույն թվականի հոկտեմբերի 28-ին ՀՀ Գիտությունների ազգային ակադեմիայում (ԳԱԱ) տեղի ունեցավ «Երիտասարդ գիտնականների աջակցության ծրագրի» (ԵԳԱԾ) տեղեկատվական հանդիպումը, որի ժամանակ ներկայացվեցին ԵԳԱԾ-ի ընթացիկ դրամաշնորհային մրցույթների պահանջներն ու ընթացակարգերը։

«Վերապատրաստման ծրագիր երիտասարդ գիտնականների համար մրցույթի» չորրորդ ենթածրագրին կարելի է դիմել մինչև սույն թվականի նոյեմբերի 3-ը։ Մրցույթի նպատակն է հնարավորություն ընձեռել երիտասարդ գիտնականներին՝ մասնակցելու իրենց ոլորտի նորարական մեթոդների և մասնագիտական հմտությունների ձեռքբերմանն ուղղված դասընթացներին, աջակցել երիտասարդ գիտնականների մասնագիտական որակավորման բարձրացմանը։

Մինչև սույն թվականի նոյեմբերի 5-ը հնարավոր է դիմել «Գիտական հոդվածների տպագրության համար երիտասարդ գիտնականների խրախուսման մրցույթին»։ Այս մրցույթի նպատակն է խրախուսել գիտության բոլոր բնագավառներով միջազգային հեղինակավոր գիտական ամսագրերում հոդվածների տպագրությունը, իրենց գործունեության ոլորտի առաջնակարգ ամսագրերում հոդվածների տպագրության մեջ առաջին կամ հիմնական ներդրում ունեցող երիտասարդ հեղինակներին։ 

«Գիտահետազոտական աշխատանքի իրականացման օժանդակ ռեսուրսների ձեռքբերման մրցույթին» կարելի է դիմել մինչև սույն թվականի նոյեմբերի 10-ը։ Մրցույթի նպատակն է ընդլայնել երիտասարդ գիտնականների հետազոտական աշխատանքների իրականացման հնարավորությունները, հասանելի դարձնել տվյալների հավաքագրման և վերլուծության ժամանակակից աղբյուրներն ու գործիքակազմը, աջակցել հետազոտական աշխատանքների արդյունքների տպագրմանն ու միջազգային հարթակներում դրանց ներկայացմանը։ 

«ՀՀ գիտահետազոտական կազմակերպություններ արտերկրի գիտնականների կարճատև այցելությունների կազմակերպման համար ֆինանսական աջակցության մրցույթին» դիմելու վերջնաժամկետն է սույն թվականի նոյեմբերի 20-ը։ Մրցույթի նպատակն է հնարավորություն ընձեռել երիտասարդ գիտնականների մասնագիտական կարողությունների զարգացման համար՝ մեթոդական դասընթացներ և թեմատիկ դասախոսություններ կազմակերպելու առաջատար գիտնականների ներգրավմամբ, խթանել Հայաստանի և արտերկրում գործող գիտնականների միջև հաղորդակցությունն ու համագործակցությունը մասնագիտական փորձի փոխանակման, նոր կապերի հաստատման, հետազոտական նոր նախագծերի պատրաստման ու իրականացման նպատակով։

Զանգվածային լրատվության միջոցների ներկայացուցիչների և լրագրության մասնագիտությամբ սովորող՝ առնվազն չորրորդ կուրսի ուսանողները մինչև սույն թվականի հոկտեմբերի 31-ը կարող են դիմել «Գիտության հանրայնացման մրցույթի» երկրորդ ենթածրագրին։ Այս մրցույթի նպատակն է խրախուսել երիտասարդ գիտնականների գործունեության և գիտության բոլոր բնագավառների հետազոտական արդյունքների հանրայնացումը, նպաստել հասարակության մեջ գիտության դերի և նշանակության վերաբերյալ հանրամատչելի բովանդակության ձևավորմանը, նպաստել գիտության հանրայնացման հանդեպ հետաքրքրության բարձրացմանն ու հանրայնացմամբ զբաղվող մասնագետների շրջանակի ընդլայնմանը։

ԵԳԱԾ-ը հիմնադրվել է 2012 թվականին՝ նպատակ ունենալով աջակցել գիտությամբ զբաղվող երիտասարդներին, նպաստել ՀՀ գիտական արդյունքի որակի բարձրացմանը և միջազգայնացմանը։ 

ՀՀ ԳԱԱ տեղեկատվության և հանրային կապերի բաժին 
31.10.2025թ.