Սույն թվականի հոկտեմբերի 6-ին՝ ժամը 10։00-ին, ՀՀ Գիտությունների ազգային ակադեմիայում (Մարշալ Բաղրամյան 24, 2-րդ հարկ) կմեկնարկի «Մերձավոր Արևելքի աստղագիտական ժառանգությունը-2» (AHME-2) միջազգային գիտաժողովը։

Գիտաժողովին զեկուցումներով հանդես կգան ոլորտի լավագույն մասնագետներն Ավստրալիայից, Ավստրիայից, Եգիպտոսից, Թուրքիայից, Իսպանիայից, Իտալիայից, Իրանից, Հայաստանից, Հորդանանից, Չինաստանից, Ռումինիայից, Ռուսաստանից, Վրաստանից, Տաջիկստանից։ Կներկայացվեն և կքննարկվեն թեմաներ՝ կապված Մերձավոր Արևելքի աստղագիտական ժառանգության, միջնադարյան, հնագույն աստղագիտության, Մետաքսի ճանապարհի երկայնքով աստղագիտական ժառանգության, էթնոաստղագիտության, բանահյուսության, պոեզիայի, փիլիսոփայության, արվեստի մեջ աստղագիտության, կրոնի և աստղագիտության, տիեզերական համաշխարհային ժառանգության, աստղագիտական կրթության, հանրային իրազեկման հետ։ 

Գիտաժողովը կազմակերպվում է ՀՀ ԳԱԱ Վիկտոր Համբարձումյանի անվան Բյուրականի աստղադիտարանի, Միջազգային աստղագիտական միության Հարավարևմտյան և Կենտրոնական Ասիայի աստղագիտության զարգացման տարածաշրջանային գրասենյակի (SWCA ROAD), Հայկական աստղագիտական ընկերության (ArAS), ՅՈՒՆԵՍԿՕ-ի, ՀՀ ԿԳՄՍՆ Բարձրագույն կրթության և գիտության կոմիտեի, Արտաքին գործերի նախարարության (ՅՈՒՆԵՍԿՕ-ի հանձնաժողովի) և ՀՀ ԳԱԱ կողմից՝ ՅՈՒՆԵՍԿՕ-ի հովանու ներքո։ Գիտաժողովի աշխատանքները կշարունակվեն մինչև հոկտեմբերի 10-ը։

ՀՀ ԳԱԱ տեղեկատվության և հանրային կապերի բաժին 
03.10.2025թ.