Սույն թվականի սեպտեմբերի 5-ին ՀՀ Գիտությունների ազգային ակադեմիայում անցկացվեց «Հայրիկ Մուրադյան - 120» գիտաժողովը՝ նվիրված հայ ժողովրդական երաժշտության երախտավոր, անվանի երգիչ-բանահավաք, ՀԽՍՀ վաստակավոր արտիստ Հայրիկ Մուրադյանի ծննդյան 120-ամյակին:

Գիտաժողովը բացեց ՀՀ ԳԱԱ Արվեստի ինստիտուտի տնօրենի ժամանակավոր պաշտոնակատար Աննա Ասատրյանը։ «Այսօր Արվեստի ինստիտուտի տարեգրության կարևոր օրերից մեկն է, որովհետև ակադեմիական երաժշտագիտության մեջ առաջին անգամ մենք գումարում ենք գիտաժողով՝ նվիրված հայ ժողովրդական երգի մեծ երախտավոր Հայրիկ Մուրադյանի ստեղծագործական գործունեության ժառանգության ուսումնասիրությանն ու արժևորմանը։ Գիտաժողովի ընթացքում համակողմանիորեն կներկայացվի Հայրիկ Մուրադյանի նշանակալի ներդրումը հայ երաժշտության մեջ»,- ասաց Աննա Ասատրյանը։

Գիտաժողովի մասնակիցներին ողջունեց ՀՀ ԳԱԱ հայագիտության և հասարակական գիտությունների բաժանմունքի ակադեմիկոս-քարտուղար ակադեմիկոս Յուրի Սուվարյանը։ «Անցյալ դարի 70-80-ական թվականներին Հայրիկ Մուրադյանի կատարումները, ինչպես նաև նրա կողմից ստեղծված «Ակունք» ազգագրական երգի և պարի համույթի կատարումներն ամենասպասվածներից էին մեր ժողովրդի համար։ Ի դեպ, այդ ժամանակաշրջանում, սկսած 1960-ականներից, հայ ժողովուրդը մշակութային զարթոնք ապրեց, և այդ ժամանակաշրջանում Հայրիկ Մուրադյանը վիթխարի  գործունեություն ծավալեց։ Նա և՛ որպես բանահավաք, և՛ որպես ազգագագրետ, և՛ իհարկե, որպես երգիչ կարողացավ մոռացությունից փրկել շատ ժողովրդական երգեր, տաղեր և այս ամենը մշակված ներկայացնել ժողովրդին։ Նա ձայնագրեց շուրջ 200 երգ։

Հայրիկ Մուրադյանը ձգտում էր, որ հայ ժողովրդական երգը նաև միջազգայնացվի, և դրա ցուցանիշներից մեկն այն եղավ, որ նրա կատարմամբ երկու երգ տեղ գտան 1971 թվականին Փարիզում լույս տեսած «Աշխարհի ժողովրդական ֆոլկլորը» շարքում։

Հուսով եմ, որ այսօրվա գիտաժողովում զեկուցողները հանգամանորեն կբացահայտեն Հայրիկ Մուրադյանի գործունեության երաժշտագիտական ակունքները, մակարդակը, կարժևորեն նրա վաստակը»,- ասաց Յուրի Սուվարյանը՝ հաջողություն մաղթելով գիտաժողովի մասնակիցներին։

«Հայրիկ Մուրադյան» հասարակական կազմակերպության նախագահ Նարինե Դելլալյանը երախտագիտություն հայտնեց ՀՀ ԳԱԱ Արվեստի ինստիտուտին և բանախոսներին՝ գիտաժողովի կազմակերպման առիթով։ «Առաջին անգամ է, որ մենք այսպիսի լայնածավալ վերլուծությամբ գիտաժողով ունենք, անշուշտ  շատ ցանկալի է, որ այն դառնա շարունակական, և  այս հարթակը լինի համագործակցության հարթակ»,- ասաց նա։

Գիտաժողովի ընթացքում բանախոսները հանդես եկան Հայրիկ Մուրադյանի ստեղծագործական կյանքի մասին 11 զեկուցմամբ՝ արժևորելով նրա վաստակը և թողած ժառանգությունը հայ երաժշտագիտության մեջ։ 

Գիտաժողովի արդյունքները կհանդիսանան կարևոր քայլ հայ ժողվրդական երաժշտության ուսումնասիրության գործում։

Գիտաժողովը կազմակերպել էին ՀՀ ԳԱԱ Արվեստի ինստիտուտը և «Հայրիկ Մուրադյան» հասարակական կազմակերպությունը:

ՀՀ ԳԱԱ տեղեկատվության և հանրային կապերի բաժին
08.09.2025թ․