ՀՀ գիտությունների ազգային ակադեմիայի պատվիրակությունը ՀՀ ԳԱԱ նախագահ ակադեմիկոս Աշոտ Սաղյանի գլխավորությամբ Չինաստանի Շանդուն նահանգի Ցզինան քաղաքում մասնակցել է Գիտությունների ակադեմիաների միջազգային ասոցիացիայի գիտական խորհուրդների 2-րդ համագումարին։ Այն անցկացվել է «Մեկ գոտի, մեկ ճանապարհ» նախաձեռնության շրջանակում:

Համագումարին բացման խոսքով ելույթ են ունեցել Գիտությունների ակադեմիաների միջազգային ասոցիացիայի նախագահ ակադեմիկոս Վլադիմիր Գուսակովը, Ռուսաստանի գիտությունների ակադեմիայի փոխնախագահ ակադեմիկոս Սերգեյ Ալդոշինը, Շանդոնգի նահանգի ղեկավարության, Չինաստանի Ժողովրդական Հանրապետության գիտության և տեխնոլոգիայի նախարարության ներկայացուցիչներ։

ՀՀ ԳԱԱ պատվիրակության անդամները հանդես են եկել գիտական զեկուցումներով։ Համագումարի լիագումար նիստին ներկայացվել է Գիտությունների ակադեմիաների միջազգային ասոցիացիայի ազգային բնական ժառանգության գիտական խորհրդի համանախագահ, ՀՀ ԳԱԱ բնական գիտությունների բաժանմունքի ակադեմիկոս- քարտուղար Ռուբեն Հարությունյանի, կենսաբանական գիտությունների թեկնածու  Անժելա Սարգսյանի և պրոֆեսոր Գալինա Հովհաննիսյանի «Ժամանակակից գենետիկական կենսամարկերների կիրառումը շրջակա միջավայրի մոնիթորինգում» թեմայով զեկուցումը: 

Կլիմայի փոփոխության հարցերին նվիրված նիստին ներկայացվել է ՀՀ ԳԱԱ նախագահ ակադեմիկոս Աշոտ Սաղյանի, ՀՀ ԳԱԱ «Հայկենսատեխնոլոգիա» գիտաարտադրական կենտրոնի տնօրեն Ավետիս Ծատուրյանի և փոխտնօրեն Վիգեն Գոգինյանի «Կենսատեխնոլոգիաներ և կլիմայի փոփոխություն․ ծանր մետաղների հեռացման հեռանկարները աղտոտված միջավայրերից» թեմայով զեկուցումը:

Հումանիտար և սոցիալական գիտություններին նվիրված նիստին  ՀՀ ԳԱԱ Հրաչյա Աճառյանի անվան լեզվի ինստիտուտի նյարդահոգելեզվաբանական լաբորատորիայի վարիչ, ՀՀ ԳԱԱ Երիտասարդ գիտնականների միավորման նախագահ Սիրանուշ Հովհաննիսյանը ներկայացրել է արհեստական բանականության խնդիրները քիչ ուսումնասիրված լեզուներում՝ նեյրոպլաստիկության տեսանկյունից: 

Երիտասարդ գիտնականների նիստին Սիրանուշ Հովհաննիսյանը ներկայացրել է Հայաստանի երիտասարդ գիտնականների ներկայիս գործունեությունը, իսկ ՀՀ ԳԱԱ ԱՊՀ հարցերով փորձագետ Գևորգ Վարդանյանը ներկայացրել է համատեղ դրամաշնորհների, վերապատրաստումների և միջազգային համագործակցության հեռանկարները։ 

ՀՀ ԳԱԱ տեղեկատվության և հանրային կապերի բաժին
12․06․2025թ․