Բույսերի ցողունների արխիտեկտոնիկայի` անատոմամորֆոլոգիական կառուցվածքի առանձնահատկությունների, նյութի ֆիզիկամեխանիկական հատկությունների ուսումնասիրություն, ցողունների կտրման գործընթացի տեսական և փորձնական հետազոտություններ: Կինեմատիկական և էներգետիկ տեսանկյունից ամենանպաստավոր կտրման եղանակի բացահայտում և այն իրականացնող կտրող ապարատների (թվով 15) մշակում: Տեսական և գիտափորձնական հետազոտությունները նվիրված են նաև գյուղատնտեսական արտադրության աշխատատար գործընթացների մեքենայացման համար արդյունավետ` թրթռագործողության տեխնոլոգիաների, գյուղատնտեսական մեքենաների բանող օրգանների տեխնոլոգաերկրաչափական պարամետրերի և աշխատանքային ռեժիմի հիմնավորման գիտական հիմունքների մշակմանը: Վերջին 10 տարիներին Ա.Թարվերդյանի հետազոտությունները նվիրված են հանրապետության համար կարևոր ոլորտի՝ այգեգործության համար հողամշակ ֆրեզ-մեքենաների, ինչպես նաև ագրոռոբոտների մշակմանն ու պարամետրերի ճշգրտմանը:

Ավարտել է նախկին Հայկական գյուղատնտեսական ինստիտուտի գյուղատնտեսության մեքենայացման ֆակուլտետը (1968 թ.): Տեխ. գիտ. թեկնածու (1979 թ.), դոցենտ (1983 թ.), տեխ. գիտ. դոկտոր (1997 թ.), պրոֆեսոր (2002 թ.), ՀՀ ԳԱԱ թղթակից անդամ (2006 թ.), ՀՀ ԳԱԱ իսկական անդամ (2014 թ.)

Հայաստանի ազգային ագրարային համալսարանի ռեկտոր (1998-2018թթ․): ՀԱԱՀ Գյուղմեքենայացման և ավտոմատացման ԳՀԻ Դաշտավարության և անասնապահության մեքենայացման բաժնի գլխավոր գիտաշխատող (2019թ․-ից): «Գյուղատնտեսության մեքենայացման և մեքենաներ» մասնագիտական խորհրդի անդամ:

ՌԴ Տիմիրյազևի անվան ագրարային համալսարանի, Կրասնոդարի ագրարային     համալսարանի, Բելոռուսի, Մոլդովայի, Տաջիկստանի, Ուկրաինայի, Վրաստանի, Ղազախստանի ագրարային համալսարանների պատվավոր դոկտոր: Վրաստանի, «Ագրարային գիտությունների տեղեկագիր» միջազգային գիտական պարբերականի խմբագրական կոլեգիայի անդամ:

«Անանիա Շիրակացի» մեդալ (2000թ․), ՌԴ «Տիմիրյազևի» ոսկե մեդալ (2004թ․),Սոկրատեսի անվան մրցանակ և մեդալ (Մեծ Բրիտանիա, 2007թ․), ՀՀ Գիտության վաստակավոր գործիչի(2011թ․):

250 գիտական աշխատության հեղինակ է, այդ թվում` 16 մենագրության (որոնցից մեկը հրապարակվել է ԳԴՀ-ում` անգլերեն լեզվով), 3 դասագրքի և 50 գյուտի (հեղինակային վկայագրեր և արտոնագրեր):