Նորություններ
07/02/2019
Բազմավաստակ գիտնական Աշոտ Ասլանյանի 100-ամյակին նվիրված գիտաժողով ՀՀ ԳԱԱ-ում

   Սույն թվականի փետրվարի 7-ին ՀՀ Գիտությունների ազգային ակադեմիայում մեկնարկեց բազմավաստակ գիտնական, երկրաբան, պետական գործիչ, ՀՀ ԳԱԱ ակադեմիկոս Աշոտ Ասլանյանի 100-ամյակին նվիրված գիտաժողովը: 
   Բացման խոսքով հանդես եկավ ՀՀ ԳԱԱ նախագահ, ակադեմիկոս Ռադիկ Մարտիրոսյանը` ընդգծելով Աշոտ Ասլանյանի մեծ ներդրումը երկրաբանական գիտությունների զարգացման գործում:
   ՀՀ ԳԱԱ թղթակից անդամ Ռաֆայել Մելքոնյանը իր զեկույցում ներկայացրեց Աշոտ Ասլանյանի մեծ գիտական ուղին և պատվավոր տեղը հայրենական գիտության երախտավորների շարքում:
   Աշոտ Ասլանյանը 1941 թ-ին ավարտել է Երևանի պետական համալսարանի Երկրաբանական ֆակուլտետը և մեկնել ռազմաճակատ, 1941-1943 թթ-ին մասնակցել է Հայրենական Մեծ պատերազմին: Ծանր վիրավորվելուց հետո զորացրվել է բանակից: Նա զբաղեցրել է բարձր պաշտոններ` 1965-1966 թթ-ին եղել է Երևանի Պոլիտեխնիկական ինստիտուտի ռեկտոր, 1966-1975 թթ-ին` բարձրագույն և միջնակարգ մասնագիտական կրթության մինիստր, 1975-1987 թթ-ին` Երկրաբանական գիտությունների ինստիտուտի տնօրեն: 1965 թ-ին նա ընտրվել է Հայաստանի գիտությունների ակադեմիայի թղթակից անդամ, 1986 թ-ին` Հայաստանի գիտությունների ակադեմիայի ակադեմիկոս:
Նրա ղեկավարության տարիներին Երևանի Պոլիտեխնիկական ինստիտուտում կազմակերպվեց լեռնա-մետալուրգիական ֆակուլտետ, սեյսմատեկտոնիկայի պրոբլեմային լաբորատորիա: Բարձրագույն և միջնակարգ մասնագիտական կրթության մինիստրի պաշտոնը զբաղեցնելիս նա մեծ ավանդ է ունեցել բարձրագույն դպրոցի նյութատեխնիկական բազայի ամրապնդման, ԲՈՒՀ-երում գիտահետազոտական աշխատանքների ընդլայնման, մի շարք նոր ֆակուլտետների, ամբիոնների և լաբորատորիաների կազմակերպման գործում:

  20190207_1.jpg
   «Աշոտ Ասլանյանը բազմակողմանի գիտնական էր և վստահորեն կարելի է ասել, որ նա բացառիկ երևույթ էր հայրենական երկրաբանությունում», - նշեց Ռաֆայել Մելքոնյանը:
   Չափազանց կարևոր էին Աշոտ Ասլանյանի տեսական աշխատանքները, որոնք գտնվում էին մեծ երկրաֆիզիկայի և մոլորակագիտության սահմանագծում: Այդ աշխատանքներում տրվեցին լիթոսֆերայի ֆիզիկա-մեխանիկական բնութագրերի քանակական գնահատականները Երկրի միջուկի, կեղևի խտության, մասսայի, ձևի, ծավալի և միջին տեսակարար կշռի էվոլուցիայի հաշվարկային որոշումները նրա գոյության 4.5 միլիարդ տարիների ընթացքում:
Աշոտ Ասլանյանը Նյու-Յորքի ակադեմիայի անդամ էր, երկու անգամ զբաղեցրել է մոլորակագետների Միջազգային ասոցիացիայի փոխպրեզիդենտի պաշտոնը, եղել է ԽՍՀՄ ԳԱ Անդրկովկասի չորրորդական ժամանակաշրջանի ուսումնասիրության հանձնաժողովի նախագահ:
   Ակադեմիկոս Ասլանյանն արժանացել է բարձր պետական պարգևների` Հայրենական Մեծ պատերազմի 1-ին և 2-րդ աստիճանների շքանշան, Աշխատանքային Կարմիր Դրոշի երեք շքանշան, Ժողովուրդների բարեկամության շքանշան: Նա պարգևատրվել է Գերմանիայի Միներալոգիական ընկերության Աբրահամ Վերների անվան մեդալով, ՍՍՀՄ Աշխարհագրական ընկերության Սեմյոնով-Տյանշանսկու անվան մեդալով:
   «Աշոտ Ասլանյանը կյանքից հեռացավ 1989 թ-ին` թողնելով աշխարհին իր գիտական հարուստ ժառանգությունը», - նշեց Ռաֆայել Մելքոնանը:

   ՀՀ ԳԱԱ Տեղեկատվական-վերլուծական ծառայություն
   07.02.2019 թ.
  



Կայքը վերջին անգամ թարմացվել է՝  16:16, 18/09/2020

Գլխավոր էջ - Ակադեմիայի մասին - Բաժանմունքներ - Կազմակերպություններ - Անդամներ - Կապ մեզ հետ - COVID-19 - Կառուցվածք - Նախագահության անդամներ
Փաստաթղթեր - Ինովացիոն առաջարկներ - Նորություններ - Գիտաժողովներ - Հրապարակումներ մամուլում - Հայտարարություններ - Լուսանկարներ
«Գիտություն» թերթ - Հիմնադրամներ - Հոբելյաններ - Հրատարակություններ - Վեբ ռեսուրսներ - Այլ ակադեմիաներ
Համալսարաններ - Լինդաու - Կայքի քարտեզ - Որոնում