«Ունեմ նպատակներ, բայց դրանց մասին կարելի է խոսել իրագործելուց հետո: Ինձ համար օրինակելի է Նիկոլա Տեսլան: Գիտության ոլորտում անխուսափելի են հիասթափություններն ու անկումները, բայց ի սկզբանե պատրաստ էի, որ ամեն ինչ չի կարող միանգամից հարթ գնալ: Պարզապես ձգտում եմ առաջ շարժվել՝ առանց նահանջի: Գիտությունը, տեղեկատվական տեխնոլոգիաները հետաքրքրել են դեռ դպրոցական տարիքից: Ե՛վ հետաքրքիր է, և՛ հեռանկարային: Այսօր որոշ սպասելիքներ արդարացվել են: Կարծում եմ՝ հիմնական անելիքներն ու հաջողություններն առջևում են»: 

ՀՀ ԳԱԱ Օրբելու անվան ֆիզիոլոգիայի ինստիտուտի գիտաշխատող, կենսաինֆորմատիկայի ոլորտի մասնագետ Աշոտ Մելտոնյանը 29 տարեկան է, Երևան քաղաքից: Սովորել է Հայաստանի ազգային պոլիտեխնիկական համալսարանում՝ ինֆորմատիկա և հաշվողական տեխնիկա մասնագիտությամբ, այնուհետև ՀՀ ԳԱԱ Ինֆորմատիկայի և ավտոմատացման պրոբլեմների ինստիտուտում: Ներկայում ՀՀ ԳԱԱ Օրբելու անվան ֆիզիոլոգիայի ինստիտուտի հայցորդ է և գիտաշխատող, ինստիտուտի Երիտասարդ գիտնականների խորհրդի անդամ:

Ֆիզիոլոգիայի ինստիտուտում Աշոտ Մելտոնյանն աշխատում է ֆոսֆոլիպիդային երկշերտի համակարգչային մոդելի ստեղծման և դինամիկ սիմուլացիայի իրականացման վրա: Կատարվում են αvβ3 ինտեգրինի (տրանսմեմբրանային ընկալիչ, որը հեշտացնում է բջիջ-բջիջ և բջջ-արտբջջային մատրիցային  կպչունությունը) համակարգչային մոդելի ստեղծման, մոլեկուլային դինամիկ սիմուլյացիայի աշխատանքներ, որոնք հետագայում պետք է կազմեն մեկ ընդհանուր համակարգ հետագա հետազոտություններ կատարելու համար: Համագործակցում է ՀՀ ԳԱԱ Գիտակրթական միջազգային կենտրոնի կենսաինֆորմատիկայի խմբի ու Ինֆորմատիկայի և ավտոմատացման պրոբլեմների ինստիտուտի հետ: 

Աշոտ Մելտոնյանը որպես երկրի զարգացման կարևոր ճյուղ առանձնացնում է տեղեկատվական տեխնոլոգիաների ոլորտը, շեշտում դրա կարևորությունն ու արդիականությունը. «‎Այսօր ամբողջ աշխարհում գրեթե բոլոր ոլորտներում տեղեկատվական տեխնոլոգիաների գործիքների կիրառումը գնալով ավելի գերակշռող է դառնում: Մեր պետության համար բարձր տեխնոլոգիաներ զարգացնելը կարևոր է՝ հատկապես ներկա բարդ աշխարհաքաղաքական իրավիճակում: Նոր տեխնոլոգիաները մեզ մոտ գիտության ոլորտում հասանելի են ոչ բոլոր խնդիրների լուծման համար։ Կարծում եմ, որ մեծ ներուժ ունենք ծրագրային ապահովման մշակման ոլորտում, բայց հաշվողական ռեսուրսների արտադրության մասով հնարավորությունները սակավ են։ Մեր ոլորտում կիրառում ենք համակարգչային մոդելավորում, դինամիկ սիմուլյացիա, արհեստական բանականություն։ Եթե հնարավոր լիներ՝ կցանկանայի ձեռք բերեինք մեծ հաշվողական ռեսուրսներ ունեցող սերվեր»։ 

Երիտասարդ գիտնականի կարծիքով՝ պետությունը պետք է ուղենիշեր սահմանի և սերտ համագործակցություն հաստատի մասնավոր հատվածի հետ, ավելացնի գիտության ոլորտի ֆինանսավորումը, ստեղծի մեխանիզմներ երիտասարդներին գիտության ոլորտ ներգրավելու համար: «Կարևոր և մոտիվացնող է գիտնականին ապահովել արժանապատիվ վարձատրությամբ, որպեսզի նա կարողանա իր ողջ ժամանակն ու կարողությունները նվիրել գիտությանը: Իր հերթին գիտնականը պետք է ձգտի հաստատել սերտ համագործակցություն արտերկրի գիտնականների հետ, մեկնի գործուղումների, մասնակցի միջազգային ծրագրերի, գիտաժողովների, միջազգային փորձը տեղայնացնի Հայաստանում, - ասում է Աշոտ Մելտոնյանը և նշում, -  գիտության ոլորտի առաջխաղացման համար կարևոր դեր ունեն գիտական երիտասարդական նախաձեռնությունները: Շատ դրական եմ գնահատում «Գիտուժ» նախաձեռնության գործունեությունը, կարևորում եմ նպատակային թիրախավորումը, արդյունքի հասնելու հետևողականությունը»։

Մոնիկա Երիցյան