Սույն թվականի սեպտեմբերի 29-ին՝ ժամը 09:30-ին, ՀՀ Գիտությունների ազգային ակադեմիայում տեղի կունենա «Արհեստական բանականությունը գիտության և արդյունաբերության մեջ․ հնարավորություններ և մարտահրավերներ» թեմայով կլոր սեղանը: Հիմնական զեկուցմամբ հանդես կգա աշխարհահռչակ գիտնական, Դուբնայի Միջուկային հետազոտությունների միացյալ ինստիտուտի Միջուկային ռեակցիաների լաբորատորիայի գիտական ղեկավար, ՌԳԱ ակադեմիկոս, ՀՀ ԳԱԱ արտասահմանյան անդամ Յուրի Հովհաննիսյանը։ 

Կլոր սեղանին կմասնակցեն Դուբնայի Միջուկային հետազոտությունների միացյալ ինստիտուտի տնօրեն, ՌԳԱ ակադեմիկոս Գրիգորի Տրուբնիկովը, Սկոլկովոյի գիտության և տեխնոլոգիաների ինստիտուտի Նյութերի նախագծման լաբորատորիայի ղեկավար, Սբերբանկի համալսարանի գիտական ղեկավար, ՌԳԱ պրոֆեսոր, ՀՀ ԳԱԱ արտասահմանյան անդամ Արտեմ Օհանովը,  ՌԳԱ Համակարգային ծրագրավորման ինստիտուտի տնօրեն, ՌԳԱ ակադեմիկոս, ՀՀ ԳԱԱ արտասահմանյան անդամ Հարություն Ավետիսյանը,  Ռուսաստանի Դաշնության նախագահի միջազգային մշակութային համագործակցության հարցերով հատուկ ներկայացուցիչ, պրոֆեսոր Միխայիլ Շվիդկոյը, Սկոլկովոյի գիտության և տեխնոլոգիաների ինստիտուտի ռեկտոր, Մոսկվայի պետական համալսարանի հիմնարար ֆիզիկաքիմիական ճարտարագիտության ֆակուլտետի դեկանի պաշտոնակատար, ՌԳԱ ակադեմիկոս Յուլիա Գորբունովան, «Կոմերսանտ» հրատարակչական տան գլխավոր տնօրենի տեղակալ Վիկտոր Լոշակը, Դուբնայի Միջուկային հետազոտությունների միացյալ ինստիտուտի Տեղեկատվական տեխնոլոգիաների լաբորատորիայի գիտական ղեկավար, պրոֆեսոր Վլադիմիր Կորենկովը, ՀՀ ԳԱԱ փոխնախագահ Արամ Պապոյանը, ՀՀ ԳԱԱ ակադեմիկոս Յուրի Շուքուրյանը, Ռուս-Հայկական համալսարանի ռեկտոր, պրոֆեսոր Էդուարդ Սանդոյանը, Երևանի պետական համալսարանի ռեկտոր, պրոֆեսոր Հովհաննես Հովհաննիսյանը, Մոսկվայի ավիացիոն ինստիտուտի թվայնացման գծով պրոռեկտոր, պրոֆեսոր Սերգեյ Պոպովը։

Կլոր սեղանի ժամանակ կքննարկվեն արհեստական բանականության ազդեցությունը գիտական հայտնագործությունների վրա, ինչպես նաև հիմնարար գիտության, արհեստական բանականության, գիտական հաշվարկների և արդյունաբերության հատման կետում առաջացող նոր հնարավորությունները։

Կքննարկվի մարդու և արհեստական բանականության փոխկապակցվածությունը, հաշվարկային և փորձարարական ենթակառուցվածքների դերը, ինչպես նաև գիտահետազոտական ինստիտուտների և արդյունաբերության միջև արհեստական բանականության տեխնոլոգիաների մշակման և կիրառման ոլորտում աճող համագործակցությունը։ Առանձին ուշադրություն կդարձվի արհեստական բանականության վրա հիմնված նորարարությունների հնարավորություններին և մարտահրավերներին։

Իսկ սեպտեմբերի 30-ին՝ ժամը 10։00-ին, ՀՀ ԳԱԱ-ում տեղի կունենա «Արհեստական բանականությունը կենսաբժշկության, դեղագործության և նյութագիտության մեջ․ գենոմային տվյալներից մինչև նոր դեղամիջոցներ և նյութեր» կլոր սեղանը։ Զեկուցումներով հանդես կգան Սկոլկովոյի գիտության և տեխնոլոգիաների ինստիտուտի նյութերի նախագծման լաբորատորիայի ղեկավար, Սբերբանկի համալսարանի գիտական ղեկավար, ՌԳԱ պրոֆեսոր, ՀՀ ԳԱԱ արտասահմանյան անդամ Արտեմ Օհանովը,  ՌԳԱ Համակարգային ծրագրավորման ինստիտուտի տնօրեն, ՌԳԱ ակադեմիկոս, ՀՀ ԳԱԱ արտասահմանյան անդամ Հարություն Ավետիսյանը, Մոլեկուլային կենսաբանության ինստիտուտի Կենսաբանական գործընթացների համակարգչային մոդելավորման լաբորատորիայի վարիչ Կարեն Նազարյանը և Հակավիրուսային դեղամիջոցների հայտնաբերման լաբորատորիայի վարիչ Հովակիմ Զաքարյանը, ֆիզիկատեխնիկական գիտությունների դոկտոր Սևակ Սարգսյանը և ֆիզիկամաթեմատիկական գիտությունների թեկնածու Զավեն Նավոյանը։ Կլոր սեղանը կվարեն ՀՀ ԳԱԱ թղթակից անդամ Ռուբեն Հարությունյանը և ՀՀ ԳԱԱ ասոցացված անդամ Արսեն Առաքելյանը։

Այս կլոր սեղանի ժամանակ կքննարկվեն կենսաբժշկության, գենոմիկայի, դեղագործության և նյութագիտության ոլորտներում արհեստական բանականության մեթոդների կիրառման և զարգացման ժամանակակից ուղղությունները, կներկայացվեն հայկական գիտական և կրթական կազմակերպությունների և ռուսական գիտական կենտրոնների նախագծերը։ 

Կլոր սեղաններն անցկացվում են Հայաստանում Դուբնայի Միջուկային հետազոտությունների միացյալ ինստիտուտի (Ռուսաստանի Դաշնություն) օրերի շրջանակում՝ նվիրված ինստիտուտի հիմնադրման 70-ամյակին։

ՀՀ ԳԱԱ տեղեկատվության և հանրային կապերի բաժին
28․09․2026թ․