Սույն թվականի սեպտեմբերի 29-ին ՀՀ ԳԱԱ Արևելագիտության ինստիտուտում տեղի ունեցավ հանդիպում մարզային ԲՈՒՀ-երի ներկայացուցիչների հետ։ Հանդիպման ընթացքում ինստիտուտի կողմից շուրջ 100 անուն գիրք նվիրաբերվեց Շիրակի, Գավառի, Վանաձորի և Իջևանի պետական համալսարաններին, ինչպես նաև «Կաճառ» գիտական կենտրոնին։

ՀՀ ԳԱԱ Արևելագիտության ինստիտուտի տնօրեն Գոհար Իսկանդարյանը նշեց, որ նախաձեռնության նպատակն է նպաստել մարզային համալսարանների զարգացմանը, հաստատել նոր կապեր, իրականացնել համատեղ աշխատանքներ, ծրագրեր, կազմակերպել դասախոսություններ։ «Այս աշխատանքը պետք է շարունակական լինի։

Նմանատիպ համագործակցություն ունենք Երևանի պետական համալսարանի, Ռուս-Հայկական համալսարանի, ՀՀ ՊՆ Վազգեն Սարգսյանի անվան ռազմական ակադեմիայի, ՀՀ ՊՆ Պաշտպանական ազգային հետազոտական համալսարանի հետ։ Եվ մեզ համար ռազմավարական քայլ է ընդլայնել այս համագործակցությունը՝ ընդգրկելով մարզային համալսարանները», - ասաց Գոհար Իսկանդարյանը։

Քննարկվեց գիտական ոլորտում հետագա համագործակցության խորացման հեռանկարները։ Մարզային ԲՈՒՀ-երի ներկայացուցիչները շնորհակալություն հայտնեցին՝ ընդգծելով ակադեմիական ինստիտուտի հետ համագործակցության անհրաժեշտությունն ու կարևորությունը։ 

ՀՀ ԳԱԱ տեղեկատվության և հանրային կապերի բաժին
30․09․2025թ․