ՀՀ գիտությունների ազգային ակադեմիայում (ՀՀ ԳԱԱ) տեղի ունեցավ «Հայկական համադպրոցական գիտության փառատոն-2025»-ի հաղթող նախագծերի պարգևատրման արարողությունը:
«Հայկական համադպրոցական գիտության փառատոն-2025»-ի նպատակն է դպրոցահասակ երիտասարդների շրջանում գիտական հետազոտությունների նկատմամբ հետաքրքրության սերմանումը, խմբային աշխատանքի, նորարարական նախագծերի իրականացման և դրանց ներկայացման հմտությունների զարգացումը:
Փառատոնի հաղթող ճանաչվեցին 62 նախագծերի հեղինակ շուրջ 130 աշակերտներ:
«Նման միջոցառումները շատ կարևոր են և նպատակ ունեն գիտության բաղադրիչը ներդնել դպրոցներում։ Երեխաների մասնագիտական կողմնորոշումը պետք է դպրոցում տեղի ունենա։ Պետք է դպրոցներում զարգացնել բնական գիտությունները։ Այսօր մենք ապրում ենք գիտության, բարձր
տեխնոլոգիաների դարաշրջանում, և հիմքը պետք է դրվի դպրոցներում։ Գիտությունների ազգային ակադեմիայի ավելի քան երեք տասնյակ ինստիտուտները պատրաստ են աջակցելու նման նախաձեռնությունների զարգացմանը», - իր ողջույնի խոսքում ասաց ՀՀ ԳԱԱ նախագահ ակադեմիկոս Աշոտ Սաղյանը։
«Այս մրցանակները, առաջին հերթին, ձեր աշխատանքի արդյունքն են, և ուզում եմ անկեղծորեն շնորհավորել ձեզ դրա համար։ Շատ կարևոր է, երբ մարդն աշխատում է և տեսնում է իր
աշխատանքի արդյունքը։ Ձեր դեպքում դա տեղի է ունեցել։ Հուսով եմ, որ այս հաղթանակը ձեզ մոտիվացնելու և ոգևորելու է ձեր հետագա հաղթանակների ճանապարհին», - հաղթողներին շնորհավորեց ՀՀ կրթության, գիտության, մշակույթի և սպորտի նախարար Ժաննա Անդրեասյանը։
Նախարարը նշեց, որ «Հայկական համադպրոցական գիտության փառատոն»-ի շրջանակում ներկայացվող նախագծերի թիվը տարեցտարի ավելանում է։ «Եթե 2021թ-ին ընդամենը 38 նախագիծ
ունեինք, ապա 2025թ-ի համար արդեն 91 տարբեր նախագծեր են ներկայացվել 5 տարբեր անվանակարգերում։ Սա այն միջոցառումներից է, որ կրթության հանդեպ թերահավատություն
ունեցող մեր քաղաքացիներին, կարծում եմ, արժե անպայման ներկա լինել և տեսնել, թե իրականում մեր դպրոցներում ինչ աշխատանք է կատարվում։ Գիտության փառատոնի հաղթողներն են, որ հետագայում հնարավորություն են ստանում մասնակցել նաև միջազգային գիտական
փառատոնների։ Ես վստահ եմ, որ առաջիկա տարիներին մեր երեխաները նաև միջազգային գիտական փառատոններից են վերադառնալու մեծ հաջողություններով», - ասաց ՀՀ կրթության, գիտության, մշակույթի և սպորտի նախարար Ժաննա Անդրեասյանը։
ՀՀ ԳԱԱ տեղեկատվության և հանրային կապերի բաժին
29․05․2025թ․
![academy [@] sci.am](images/email.jpg "academy [@] sci.am")
