Սույն թվականի հունվարի 27-ին ՀՀ գիտությունների ազգային ակադեմիայում տեղի ունեցավ ՀՀ արվեստի վաստակավոր գործիչ, ՀՀ ԳԱԱ արվեստի ինստիտուտի երաժշտության բաժնի առաջատար գիտաշխատող, արվեստագիտության դոկտոր, պրոֆեսոր Աննա Արևշատյանի «Տիգրան Մանսուրյան» մենագրության շնորհանդեսը։ 

Գիրքը նվիրված է Հայաստանի ժողովրդական արտիստ, անվանի կոմպոզիտոր Տիգրան Մանսուրյանի ծննդյան 85-ամյակին։ Գրքի խմբագիրն է արվեստագիտության դոկտոր Լևոն Հակոբյանը, գրախոսներն են ՀՀ արվեստի վաստակավոր գործիչներ Աննա Ասատրյանն ու Մհեր Նավոյանը։

Միջոցառմանը մասնակցեցին մաեստրո Մանսուրյանի ընտանիքի անդամները, ընկերները, գործընկերները, ՀՀ արվեստի և մշակույթի գործիչներ, երիտասարդ հետազոտողներ։ 

«Դժվար է ասել, թե ինչ է նշանակում մեկի համար իր մասին գիտական հայերենով հրաշալի ձևակերպմամբ նման աշխատությունը։ Ինձ համար անչափ հուզիչ է այս ամենը։ Շնորհակալ եմ բոլորիդ ձեր ներդրած եռանդի համար», - նշեց մաեստրո Մանսուրյանը։  

Մենագրության հեղինակ Աննա Արևշատյանը պատմեց, որ գիրքը գրելու գաղափարը ծնվել է 2022 թվականին՝ Իտալիայում աշխատանքային այցի ժամանակ, երբ իտալական տարբեր քաղաքների մշակութային կենտրոններում հիշատակվում էր Տիգրան Մանսուրյանի ստեղծագործությունների մասին։ «Միամտաբար, երբ ես սկսում էի գրքի վրա աշխատել, ինձ թվում էր, որ ես գործը գլուխ կբերեմ մի 6-7 ամսվա ընթացքում, բայց պարզվեց, որ այն, ինչ ինձ

հայտնի է, միայն այսբերգի երևացող մասն է կամ նրա գագաթը, իսկ ողջ ստեղծագործական ժառանգությունը մաեստրոյի հսկայածավալ է, ընդգրկուն, բազմաժանր, բազմաշերտ, և դա ինձ ստիպեց խորանալու, մանրամասն ծանոթանալու։ Ես շնորհակալ եմ մաեստրոյին տրամադրած ժամանակի և նյութերի համար։ Մեր զրույցներն անմոռանալի են ինձ համար», - ասաց Աննա Արևշատյանը։ 

Շնորհավորելով Տիգրան Մանսուրյանին՝ ՀՀ կրթության, գիտության, մշակույթի և սպորտի նախարարի տեղակալ Դանիել Դանիելյանը շեշտեց մաեստրոյի նշանակալի վաստակը մեր երկրի երաժշտաարվեստի զարգացման գործում։ Դանիել Դանիելյանը նշեց, որ մենագրությունը համակողմանի բացահայտում է Մաեստրոյին, նրա ստեղծագործական կյանքն ու գործունեությունը։ «Ինչպես հեղինակն է գրքում նշում՝ մաեստրոն ոչ միայն երաժիշտ է, այլ նաև մտածող, արարող, գեղագետ՝ իր երաժշտությամբ, իր էությամբ», - ասաց Դանիել Դանիելյանը։ 

Տիգրան Մանսուրյանին շնորհավորեց ՀՀ ԳԱԱ հայագիտության և հասարակական գիտությունների բաժանմունքի ակադեմիկոս-քարտուղար Յուրի Սուվարյանը։ «Մաեստրոն իր ստեղծագործություններով զարգացրել է հայ մշակույթը, հատկապես՝ երաժշտական մշակույթը, և այս աշխատությամբ գնահատվել է մեծ արվեստագետի ժառանգությունը գիտական սկզբունքներով», - նշեց Յուրի Սուվարյանը։ 

ՀՀ արվեստի վաստակավոր գործիչ, ՀՀ ԳԱԱ արվեստի ինստիտուտի տնօրեն Աննա Ասատրյանը նշեց, որ Տիգրան Մանսուրյանի ստեղծագործական գործունեությունը միշտ գտնվել է պրոֆեսոր Աննա Արևշատյանի տեսադաշտում։ «Երաժշտագետը քայլ առ քայլ հասավ տրամաբանական հանգրվանին և սեղանին դրեց այս մենագրությունը, որի վրա նա աշխատել է վերջին մի քանի տարիների ընթացքում։ Սա առաջին գիրքն է Տիգրան Մանսուրյանի մասին։ Վստահ եմ, որ այս գիրքը մեծ ոգևորություն է պատճառելու անվանի կոմպոզիտորին և մղելու է նորանոր ստեղծագործական սխրանքների», - ասաց Աննա Ասատրյանը։ Նա նշեց, որ գրքում հեղինակը կազմել է Տիգրան Մանսուրյանի ստեղծագործությունների ցանկն ըստ ժանրերի, որը գիտական շրջանառության մեջ է դրվում առաջին անգամ։ Հեղինակը կազմել է Տիգրան Մանսուրյանի մասին առկա մատենագիտությունը։ 

Մենագրությունը հրատարակել է ՀՀ ԳԱԱ «Գիտություն» հրատարակչությունը՝ Երևանի քաղաքապետարանի աջակցությամբ։ «Սիրելի մաեստրո, Ձեր կյանքը լավագույն օրինակներից մեկն է հայ ժողովրդի, Դուք անքակտելիորեն կապված եք մեզանից յուրաքանչյուրի հետ», - նշեց Երևանի քաղաքապետարանի մշակույթի և տուրիզմի վարչության պետ Գոշ Սարգսյանը։

ՀՀ ԳԱԱ արվեստի ինստիտուտի երաժշտության բաժնի առաջատար գիտաշխատող, արվեստագիտության դոկտոր, պրոֆեսոր Մհեր Նավոյանը ներկայացրեց մենագրության բովանդակությունը։ «Գիրքը փաստում է, որ մեր երաժշտագիտությունն իր բարձր պրոֆեսիոնալ մակարդակով ապրում է և պտուղ է տալիս», - նշեց Մհեր Նավոյանը։ 

ՀՀ ԳԱԱ գիտության հանրայնացման և հասարակայնության հետ կապերի բաժին
29․01․2025թ․