Սույն թվականի մայիսի 26-ին ՀՀ Գիտությունների ազգային ակադեմիայում տեղի ունեցավ Հայ օգնության ֆոնդի հովանու ներքո գործող Երվանդ Թերզյանի անվան Գիտության և կրթության հայկական ազգային հիմնադրամի (ԳԿՀԱՀ-ANSEF) դրամաշնորհների հանձնման արարողությունը: Այս տարի դրամաշնորհ ստացավ 10 գիտական խումբ։ Յուրաքանչյուր դրամաշնորհի գումարը 7․500 դոլարին համարժեք դրամ է:  

Միջոցառմանը մասնակցեցին ՀՀ ԳԱԱ թղթակից անդամ Ռուբեն Հարությունյանը, ՀՕՖ-ի փոխտնօրեն, ԳԿՀԱՀ-ի կրթական ծրագրերի ղեկավար Էդուարդ Կարապետյանը, ՀՕՖ-ի հայաստանյան մասնաճյուղի տնօրեն Բագրատ Սարգսյանը, գիտաշխատողներ ՀՀ տարբեր գիտական կառույցներից։ 

Շնորհավորելով շահառու գիտական խմբերի մասնակիցներին՝ Ռուբեն Հարությունյանը նշեց, որ ՀՀ ԳԱԱ-ն, «Բարձրագույն կրթության և գիտության մասին» նոր օրենքի համաձայն, իրականացնելու է Հայաստանում գիտական փորձաքննական գործունեություն՝ հանդես գալով որպես գլխավոր փորձագիտական կառույց։ Այս համատեքստում նա կարևորեց ՀՕՖ-ի հետ համագործակցությունը՝ նշելով, որ նոր կարգավիճակով այն կարող է առավել ընդլայնվել։

ԳԿՀԱՀ-ի կրթական ծրագրերի ղեկավար Էդուարդ Կարապետյանը նշեց, որ տարեցտարի աճում է դրամաշնորհային մրցույթներին դիմողների քանակը, իսկ 2026 թվականն աննախադեպ է եղել։ 166 հայտերից ընտրվել է 10-ը։ 

ՀՕՖ-ի հայաստանյան մասնաճյուղի տնօրեն Բագրատ Սարգսյանը  նշեց, որ իրական զարգացում ունենում են հենց այն երկրները, որոնք ճիշտ ներդրում են կատարում գիտության մեջ։

Նշվեց, որ անցած 26 տարիների ընթացքում ԳԿՀԱՀ-ի հետազոտական խորհրդին ներկայացվել է 3732 դիմում-առաջարկ, որոնցից դրամաշնորհ ստացել է 632 գիտական խումբ: Ծրագրի դրամաշնորհային ընդհանուր գումարը կազմել է 3 միլիոն 267,500 ԱՄՆ դոլարին համարժեք ՀՀ դրամ:

ՀՀ ԳԱԱ տեղեկատվության և հանրային կապերի բաժին
27.05.2026թ.