Գիտափորձեր ու գիտական խաղեր, անմիջական շփում առաջատար գիտնականների հետ, ինտերակտիվ ցուցադրություններ, նկարչություն հայտնի արվեստագետների մասնակցությամբ, հումանոիդ ռոբոտի ներկայացում, համերգային ծրագիր։ Այս ամենը  «Եվրոպական հետազոտողների գիշեր Հայաստանում» գիտության փառատոնի ընթացքում էր, որն անցկացվեց Հայաստանի երեք խոշոր քաղաքներում՝ Երևանում, Վանաձորում և Գյումրիում։ Մի քանի տասնյակ գիտահետազոտական կազմակերպություններ, ԲՈՒՀ-եր, դպրոցներ, մասնավոր ընկերություններ ներկայացրին իրենց գիտական ձեռքբերումներն ու նորարարական մշակումները։

Փառատոնը կազմակերպվել էր «ERNA - European Researchers’ Night in Armenia» նախագծի շրջանակում՝ «Գիտությունը՝ քաղաքացիների համար, քաղաքացիները՝ գիտության․ դիմակայելով մարտահրավերներին՝ կերտենք ապագան» խորագրով։

Երևանում այն անցկացվեց ՀՀ Գիտությունների ազգային ակադեմիայում։ Գիտական տաղավարների ցուցադրություններին ծանոթացան ՀՀ ԿԳՄՍ նախարար Ժաննա Անդրեասյանը և ՀՀ ԳԱԱ նախագահ Աշոտ Սաղյանը։

«Տարեսկզբին հաստատված ՀՀ գիտության ոլորտի զարգացման 2026-2030 թթ. ռազմավարական ծրագրում առանձին ուղղություն են գիտության հանրայնացումն ու դպրոցահասակների համար գիտական գործընթացները, գիտության աշխարհն ավելի հասանելի և մոտ դարձնելը: Եվ այսպիսի միջոցառումներն ուղղված են հենց այդ նպատակին: Վստահ եմ՝ դրանք կարևոր ազդեցություն են թողնում մեր երեխաների մասնագիտական կողմնորոշման, բնագիտական առարկաներն ավելի լավ յուրացնելու և սովորելու ցանկության, հետաքրքրասիրության աճի վրա», - նշեց նախարար Ժաննա Անդրեասյանը:

Ողջունելով փառատոնի մասնակիցներին՝ ՀՀ ԳԱԱ նախագահ, ակադեմիկոս Աշոտ Սաղյանը նշեց, որ ներկայում ՀՀ Գիտությունների ազգային ակադեմիան բարեփոխումների ճանապարհին է։ 12 տարվա ընդմիջումից հետո անցկացվել են ՀՀ ԳԱԱ անդամների ընտրություններ՝ միջազգային չափանիշներին համապատասխան։ Հիմք են ընդունվել գիտաչափական տվյալները։ «Փոխվելու և կատարելագործվելու են ակադեմիայի կառուցվածքը և գործառույթները, և ERNA նախագիծը, որը տրամադրել է Եվրոպական միությունը, պետք է ընդունել որպես առաջին քայլ։ Նմանատիպ միջոցառումները կլինեն շարունակական և լուրջ խթան կդառնան Հայաստանում գիտության զարգացման և երիտասարդ գիտնականներին գիտության մեջ պահելու համար», - ասաց ՀՀ ԳԱԱ նախագահը։

ԵՄ դեսպան Վասիլիս Մարագոսը նշեց՝ միջոցառումը խթան կհանդիսանա, որպեսզի դպրոցականներն ու երիտասարդներն իրենց ուժերը կենտրոնացնեն կրթության և հետազոտությունների ուղղությամբ՝ ավելի մոտենալով ակադեմիական շրջանակներին։ 

ERNA նախագծի ԵՄ համակարգող Բրիգիտա Բյոսսեն՝ կարևորելով միջոցառումը, նշեց․ «Այն հետաքրքրասիրության, բացահայտումների և երևակայության մասին է։ Հայաստանն առաջին անգամ է մասնակցում այս կարևոր նախաձեռնությանը և միանում է եվրոպական շատ երկրների՝ կարևորելով գիտությունն ու հետազոտությունները։ Այս տարին հատկապես կարևոր է, քանի որ 2026 թվականին նշվում է «Մարի Սկլոդովսկա-Կյուրիի գործողություններ» (MSCA) ծրագրի 30-ամյակը, որի շրջանակում իրականացվում է այս նախաձեռնությունը։ Սա Եվրոպական միության առաջատար ծրագիր է։ Այս 30 տարիների ընթացքում ծրագիրն աջակցել է ավելի քան 150 հազար հետազոտողների։ Նոբելյան մրցանակի 23 դափնեկիր մասնակցել է այս ծրագրին` որպես  կրթաթոշակառու, ղեկավար կամ համակիր։ Սա համաշխարհային գիտական համայնք է»։

«Եվրոպական հետազոտողների գիշեր Հայաստանում» գիտության փառատոնը կազմակերպվել է «ERNA - European Researchers’ Night in Armenia» նախագծի շրջանակում, որը հաղթող է ճանաչվել Եվրոպական հանձնաժողովի կողմից իրականացվող «MSCA & Citizens 2025» մրցույթում։ Նախագծի գործընկերներն են ՀՀ ԿԳՄՍՆ Բարձրագույն կրթության և գիտության կոմիտեն, «Գիտական և նորարարական գործընկերությանն աջակցման կենտրոն» հիմնադրամը, «Հայկենսատեխնոլոգիա» գիտաարտադրական կենտրոնը, «Ձեռնարկությունների ինկուբատոր» հիմնադրամը։

ՀՀ ԳԱԱ տեղեկատվության և հանրային կապերի բաժին
30․09․2026թ․