Սույն թվականի հունիսի 13-ին ՀՀ ԳԱԱ նախագահությունը ՀՀ ԳԱԱ Հրաչյա Աճառյանի անվան լեզվի ինստիտուտի տնօրենի պաշտոնում վերընտրեց բանասիրական գիտությունների դոկտոր, դոցենտ Վիկտոր Կատվալյանին:
Հրաչյա Աճառյանի անվան լեզվի ինստիտուտի գործունեության հիմնական ոլորտներն են`

• հայոց լեզվի կառուցվածքի և գործառության, պատմության և համեմատական քերականության ուսումնասիրություն, գրական արևելահայերենի և արևմտահայերենի քննություն, բարբառագիտություն, գրական լեզվի կանոնարկում, տերմինաբանության մշակում
• ուսուցողական լեզվաբանության հարցեր
• կիրառական լեզվաբանություն, հոգելեզվաբանություն, տեքստի լեզվաբանություն
• ստուգաբանական, երկլեզվյան, բարբառային, ուղղագրական-ուղղախոսական բառարանների և տերմինարանների, էլեկտրոնային համաբարբառների կազմում

    Վիկտոր Կատվալյանը, 1988–1995թթ. եղել է Հրաչյա Աճառյանի անվան լեզվի ինստիտուտի կիրառական լեզվաբա¬նության բաժնի գիտաշխատող: 1998–2004թթ. եղել է Գավառի պետական համալսարանի հումանիտար մասնագիտությունների ֆակուլտետի դեկան,  2011 թ-ից դասախոսում է Էջմիածնի Գևորգյան հոգևոր ճեմարանում: 2012թ-ից ՀՀ ԳԱԱ Հրաչյա Աճառյանի անվան լեզվի ինստիտուտի տնօրենն է:Վիկտոր Կատվալյանի հետազոտությունների ոլորտն ընդգրկում է ժամանակակից հայոց լեզուն, հայոց լեզվի պատմությունը, բարբառագիտությունը, գրաբարը, արևմտահայերենը: Նա 9 մենագրության,  60 գիտական հոդվածի հեղինակ է:

ՀՀ ԳԱԱ Տեղեկատվական-վերլուծական ծառայություն
13.06.2018թ.