Սույն թվականի հուլիսի 14-ին ՀՀ գիտությունների ազգային ակադեմիայի (ՀՀ ԳԱԱ) մաթեմատիկայի ինստիտուտում մեկնարկեց Հիմնարար և կիրառական մաթեմատիկայի միջազգային կենտրոնի (Centre International de Mathématiques Pures et Appliquées, CIMPA) ամառային գիտական դպրոցը՝ «Էլիպտիկ կորեր և դրանց կիրառությունները» թեմայով։ CIMPA գիտական ամառային դպրոցը կազմակերպվել է ՀՀ ԳԱԱ մաթեմատիկայի ինստիտուտի աջակցությամբ։

Գիտական դպրոցին մասնակցում են ավելի քան երեք տասնյակ գիտնականներ և ուսանողներ ԱՄՆ-ից, Դանիայից, Հայաստանից, Հնդկաստանից, Հունաստանից, Ռուսաստանից, Միացյալ Թագավորությունից, Թուրքիայից, Լիբանանից։

CIMPA ամառային գիտական դպրոցի նպատակն է մաթեմատիկայի ոլորտի արդի և կարևոր թեմաները ներկայացնել զարգացող երկրներում։ CIMPA ամառային գիտական դպրոցի կազմակերպիչներից է Փենսիլվանիայի պետական

համալսարանի պրոֆեսոր Միհրան Պապիկյանը։ «էլիպտիկ կորերը կարևոր դեր ունեն ծածկագրության մեջ և լայնորեն ուսումնասիրվում են։ էլիպտիկ կորերի կիրառմամբ լուծվել է Ֆերմայի մեծ թեորեմը, որը բաց է եղել 350

տարի։ Ներկայում այն մաթեմատիկայում լայն կիրառում ունի։ Մեր նպատակն է ներկայացնել այս ուղղությունը գիտական դպրոցի շրջանակում, զարգացնել Հայաստանում թվերի տեսությունը, ծածկագրությունը։ Այս ուղղությունները կարևոր դեր ունեն կիբեռանվտանգության մեջ։ Այսինքն, սա ռազմավարական ուղղություն է, և մենք ցանկանում ենք Հայաստանում ունենալ լավ պատրաստված մասնագետներ», - ասաց պրոֆեսոր Պապիկյանը։

Նա շեշտեց ամառային գիտական դպրոցի կարևորությունը համագործակցության, նոր կապերի զարգացման տեսանկյունից։ «Հայաստանի ուսանողների համար շատ օգտակար կլինի շփվել այլ երկրների մաթեմատիկոսների հետ, տեսնել՝ ինչպես են նրանք մտածում, միասին քննարկեն արդի խնդիրներ», - նշեց Միհրան Պապիկյանը։

CIMPA ամառային գիտական դպրոցի աշխատանքները կշարունակվեն մինչև հուլիսի 26-ը։ 

ՀՀ ԳԱԱ տեղեկատվության և հանրային կապերի բաժին
16․07․2025թ․