Խորը վշտով հայտնում ենք, որ 95 տարեկան հասակում կյանքից հեռացել է ՀՀ ԳԱԱ թղթակից անդամ, ՀՀ գիտության վաստակավոր գործիչ, տնտեսագիտության դոկտոր, պրոֆեսոր Գրիշա Ալեքսանի Ղարիբյանը:

Գրիշա Ղարիբյանը ծնվել է 1930 թ. մայիսի 25-ին ՀԽՍՀ Սիսիանի շրջանի Բորիսովկա (այժմ` ՀՀ Սյունիքի մարզի Ծղուկ) գյուղում: 1946 թ. ընդունվել է Երևանի Փ. Թերլեմեզյանի անվան նկարչական ուսումնարան: 1948 թ. ավարտել է Երևանի կայարանի երեկոյան դպրոցը, 1954 թ.` ԵՊՀ տնտեսագիտության ֆակուլտետը, 1962 թ.` ասպիրանտուրան: 1963 թ. պաշտպանել է թեկնածուական, 1973 թ.` դոկտորական ատենախոսություն: 1978 թ. նրան շնորհվել է պրոֆեսորի կոչում: 2000 թ. ընտրվել է ՀՀ ԳԱԱ թղթակից անդամ:

1954 թ.-ից Գրիշա Ղարիբյանը աշխատել է ԵՊՀ-ում. 1978-1990-ական թթ. եղել է քաղաքատնտեսության ամբիոնի, 1990-2008 թթ.՝ տնտեսագիտության տեսության ամբիոնի վարիչ, 1977-1978 թթ.՝ ԵՊՀ կուսկոմիտեի երկրորդ քարտուղար, 1978-1991 թթ.՝ հումանիտար ֆակուլտետների ուսումնական աշխատանքների գծով պրոռեկտոր: 1984 թ. նրա նախաձեռնությամբ Երևանի ժողովրդական տնտեսության ինստիտուտից տնտեսագիտական կիբեռնետիկայի ֆակուլտետը տեղափոխվել է ԵՊՀ և հետագայում դարձել տնտեսագիտության (այժմ՝ տնտեսագիտության և կառավարման) ֆակուլտետ: 1993-2000 թթ. եղել է այդ ֆակուլտետի դեկան: 2001-2023 թթ. եղել է տնտեսագիտության և միջազգային տնտեսական հարաբերությունների ամբիոնի պրոֆեսոր և «ԵՊՀ ամբիոնի պատվավոր վարիչ»:

1965-1975 թթ. Գրիշա Ղարիբյանը համատեղությամբ գլխավորել է ՀԽՍՀ պետպլանի ԳՀ ինստիտուտի սոցիալական զարգացման բաժնի աշխատանքները:

Անվանի գիտնական, պրոֆեսոր Գրիշա Ղարիբյանը հեղինակ է գիտական ավելի քան 100 աշխատության, այդ թվում՝ «Բնակչության կենսամակարդակը և նրա բարձրացումը Սովետական Հայաստանում» (Եր., 1972 թ.) և “Проблемы повышения уровня жизни населения в социалистическом обществе” (Ер., 1977 г.) մենագրությունների, համահեղինակ` «Հայաստանի Հանրապետության սոցիալ-տնտեսական զարգացման և մարդկային կապիտալի վերարտադրության հիմնախնդիրները անկախության տարիներին» (Եր., 2017 թ.) մենագրության, ինչպես նաև` «Մինչմոնոպոլիստական կապիտալիզմ» (Եր., 1971 թ.), «Մարդկային զարգացման հիմունքներ» (Եր., 2004 թ.) ուսումնական ձեռնարկների և «Տնտեսագիտություն» (Եր., 2004 թ.) բուհական դասագրքի:

Պրոֆեսոր Ղարիբյանի ղեկավարությամբ պաշտպանվել է թեկնածուական 50 ատենախոսություն: 2002-2018 թթ. եղել է ԵՊՀ-ում գործող տնտեսագիտության մասնագիտական խորհրդի նախագահ:

Իր հայրենանվեր գործունեության համար անվանի գիտնական, պրոֆեսոր Գրիշա Ղարիբյանը 1999 թ. պարգևատրվել է Մովսես Խորենացու մեդալով, 2010 թ. արժանացել է ՀՀ գիտության վաստակավոր գործչի կոչման: 2018 թ. Երևանի Հ. Շարամբեյանի անվան ժողովրդական ստեղծագործության կենտրոնում բացվել է նրա գեղանկարների անհատական ցուցահանդեսը:

Անվանի գիտնական և տնտեսագետ Գրիշա Ղարիբյանի երկարամյա՝ շուրջ 70 տարվա, բեղուն գործունեությունը Հայաստանի մայր բուհում հատկապես անգնահատելի է Տնտեսագիտության ֆակուլտետի վերաբացման և հետագա զարգացման գործում: 90-ականներին ֆակուլտետում ծավալված փոփոխությունները նոր թափ և համակարգային ընդգրկում ստացան Գրիշա Ղարիբյանի՝ որպես դեկան պաշտոնավարման տարիներին: Նրա արհեստավարժ և անմիջական կառավարման, նաև գործադրած ջանքերի և նվիրումի շնորհիվ ֆակուլտետը Համալսարանի կազմում առանձնացավ որպես փորձառու մասնագիտական կառույց՝ կրթական ոլորտում արձանագրած նշանակալի ձեռքբերումներով և գիտական բարձր մակարդակով:

Գրիշա Ղարիբյանի վաստակը մեծ է նաև երիտասարդ մասնագետների՝ որպես հայրենասեր քաղաքացի, արժանապատիվ հայ պատրաստման գործում:

ԵՊՀ տնտեսագիտության և կառավարման ֆակուլտետի ղեկավարությունն ու ՀՀ ԳԱԱ նախագահությունն իրենց ցավակցությունն են հայտնում անվանի գիտնական, պրոֆեսոր Գրիշա Ղարիբյանի ընտանիքին, հարազատներին, գործընկերներին, Հայաստանի Հանրապետության կրթական և գիտական համայնքին։

Գրիշա Ղարիբյանի մեծ ու անուրանալի վաստակն ու ներդրումը Մայր բուհի գիտակրթական կյանքում՝ որպես ժառանգություն, ընդմիշտ կմնա Հայաստանի Հանրապետության բարձրագույն կրթության և գիտության պատմության մեջ։

Գրիշա Ղարիբյանի հոգեհանգստի արարողությունը տեղի կունենա ս․թ․ մայիսի 9-ին, ժամը 17։00-20։00, Կոնդի Սուրբ Հովհաննես եկեղեցում, հրաժեշտը՝ մայիսի 10-ին, ժամը 11։30-13։00, նույն վայրից։

ՀՀ ԳԱԱ հայագիտության և հասարակական գիտությունների բաժանմունք
ԵՊՀ Տնտեսագիտության և կառավարման ֆակուլտետ