Սույն թվականի ապրիլի 26-ին ՀՀ ԳԱԱ-ում տեղի ունեցավ «Science in Space Analog Missions: AMADEE-24 Mars Simulation Results and the Future Prospects» աշխատաժողովը։ Այն կազմակերպել էին ՀՀ ԳԱԱ մոլեկուլային կենսաբանության ինստիտուտը և Հայկական տիեզերական ֆորումը։

Աշխատաժողովի ընթացքում ներկայացվեցին 2024 թվականին Հայաստանում անցկացված AMADEE 24 Մարսի անալոգային հետազոտության գիտափորձերի արդյունքները։ Քննարկվեցին WorldBiggestAnalog-2025 միջազգային անալոգային առաքելության շրջանակում գիտական նախագծերով մասնակցության հնարավորությունները, տիեզերական հետազոտությունների համատեքստում անցկացվող երկրային առաքելությունների դերը, դրանց գիտական արժեքը և հեռանկարները։

Զեկուցումներով հանդես եկան Ավստրիական տիեզերական ֆորումի հիմնադիր, AMADEE-24 առաքելության ղեկավար դոկտոր Գերնոտ Գրոմերը, Հայկական տիեզերական ֆորումի հիմնադիր, AMADEE-24 առաքելության համաղեկավար Հայկ Ասլանյանը, Ֆրաունհոֆերի փայտի ինստիտուտի ավագ գիտաշխատող Ժան Գանչերան, ՀՀ ԳԱԱ մոլեկուլային կենսաբանության ինստիտուտի տնօրեն Արսեն Առաքելյանը, Ինսբրուկի համալսարանի ավագ գիտաշխատող Բաստիան Յոախիմ-Մրոշկոն և ՀՀ ԳԱԱ մոլեկուլային կենսաբանության ինստիտուտի ավագ գիտաշխատող Ռոքսանա Զախարյանը։

AMADEE-24-ը Մարսի անալոգային առաքելությունն է Հայաստանում, որն իրականացրել է Ավստրիական տիեզերական ֆորումը՝ հյուրընկալվելով Հայաստանի օդատիեզերական գործակալության կողմից: Բարձր պատրաստվածությամբ անալոգային տիեզերագնացների փոքր

խումբը սիմուլյացիոն սկաֆանդրներով տարբեր գիտափորձեր է անցկացրել՝ հիմք նախապատրաստելով մարդկանց և ռոբոտների մասնակցությամբ Մարսի ապագա առաքելությունների համար։  

2025 թվականի հոկտեմբերին տեղի կունենա անալոգային լայնածավալ World’s Biggest Analog (WBA) առաքելությունը, որը կազմակերպում է Ավստրիական տիեզերական ֆորումը: WBA-ն ամբողջ աշխարհում 10 անալոգային լաբորատորիաներ միավորող նախաձեռնություն է: Հայաստանը դարձել է այս ծրագրի մասնակից և կդառնա հետազոտությունների տասը վայրերից մեկը։

ՀՀ ԳԱԱ գիտության հանրայնացման և հասարակայնության հետ կապերի բաժին
29.04.2025թ.