Սույն թվականի մարտի 26-ին՝ ժամը 10։00-ին, ՀՀ ԳԱԱ նախագահության կլոր դահլիճում (ք․ Երևան, Մ․ Բաղրամյան պող․, 24, 2-րդ հարկ) տեղի կունենա աշխատաժողով, որի ընթացքում կներկայացվեն 2024թ․ՀՀ ԳԱԱ հնագիտության և ազգագրության ինստիտուտի միջազգային համատեղ արշավախմբերի իրականացրած պեղումների արդյունքները։ Աշխատաժողովին կարելի է հետևել ինչպես առկա, այնպես էլ առցանց ձևաչափով։

Հաշվետու տարվա ընթացքում պեղվել և ուսումնասիրվել է Հայաստանի 30 հնավայր, որոնցից 18-ը՝ միջազգային համատեղ արշավախմբերի ուժերով։ Պեղումներն էականորեն համալրել են Հայաստանի և տարածաշրջանի նյութական և հոգևոր մշակույթի, պատմության ուսումնասիրության աղբյուրագիտական հենքը:

Տարածաշրջանի մինչ օրս հայտնի ամենահին բնակատեղիի, նոր քարի դարի և պղնձի քարի դարի նորահայտ հնավայրերի, բրոնզ-երկաթի դարերի բնակատեղիների և ամրոցների, Արտաշատ մայրաքաղաքի, Արուճի միջնադարյան դղյակի պեղումների արդյունքների մասին զեկուցումներով հանդես կգան ՀՀ ԳԱԱ հնագիտության և ազգագրության ինստիտուտի, Քոթսենի անվան հնագիտության ինստիտուտի, Տոկայի համալսարանի, Լիոն-2 համալսարանի, Գերմանիայի հնագիտության ինստիտուտի, Հոնկոնգի համալսարանի, Մաքս Պլանկի գեոմարդաբանության ինստիտուտի, Իտալիայի միջերկրյածովյան և Արևելյան հետազոտությունների ասոցիացիայի հետազոտողները։

Աշխատաժողովը կշարունակվի մարտի 27-28-ին՝ ՀՀ ԳԱԱ հնագիտության և ազգագրության ինստիտուտի ընթերցասրահում (ք․ Երևան, Չարենց 15):

ՀՀ ԳԱԱ գիտության հանրայնացման և հասարակայնության հետ կապերի բաժին
25․03․2025թ․